БИБЫЦ

Тары кæстæр фырт. Тыхгæнæг ын тых нæ ары, йæ амарынæн фæрæз нæй. Уымæн æмæ йæ тых, йæ ныфс, йæ уд кæм сты, уый ничи зоны. Сослан йæ амарынæн (кадæг «Сослан æмæ Тары фырттæ») сайдæй, æз Сосланы фыййау дæн, зæгъгæ, цынæ фæлтæрæнтæ фæкодта, фæлæ йын нæ бантыст. Бибыц та схæцынмæ агуры Нарты Сосланы. Йæ раны бахаудта нæртон гуырд. Æмæ йæ уыцы уавæрæй фервæзын кæны йе 'нæныййаргæ мад Сатана. Уый Бибыцыл йе 'взаг ауадзы æмæ дзы ракъахы: «Мæнæн мæ тых, мæ ныфс æмæ мæ уд сты хохы фидары, Бур айнæджы сæр; уым болат лагъзы мидæг ис æртæ бæлоны. Уыдонæй иу у мæ тых, дыккаг – мæ ныфс, æртыккаг та – мæ уд.

– Ау, æмæ дын сын фенæн нæй? – фæрсы Сатана.

– Куыннæ сын ис фенæн та! Мæнæ мæ кард дуарæй куы адарай, уæд сæ цурмæ тæлм адардзæни.

Сатана Бибыцæн сусæгæй ронджы нуазæныл хуыссæджы хос ныккодта æмæ йын æй афтæмæй бануазын кодта. Бибыц куыддæр афынæй, афтæ йын Сатана йæ кард сласта. Кард хурæрдæм адардтой æмæ Бур айнæджы сæр лагъзы комкоммæ арвы ронау тæлм адардта. Сослан уыцы тæлмыл æрмахуыр хъæрццыгъайы ацардыдта, æмæ уый уайтагъд лагъзы æрхæццæ кодта. Сослан æртæ бæлоны уырдыгæй систа. Бибыцы райхъал кодта æмæ йын фыццаг йæ тыхы бæлонæн йæ къубал сыскъуыдта, стæй – йæ ныфсы. Базыдта йæ Бибыц, уый фыййау нæ, фæлæ Сослан йæхæдæг кæй уыд, йæ хистæр æфсымæр Мукарайы дæр ын уый кæй амардта, æмæ ма йын йæ бон цы уыд. Сослан ын йæ уды бæлонæн дæр йæ къубал сыскъуыдта, æмæ Тары дыккаг фырт дæр амардис.

кæс «АРВЫ ДУАР»-Ы СÆРГÆНДТÆ